Gítargaldur - Vinnuhefti og Lagahefti

Gítargaldur I – Vinnuhefti og Lagahefti

Gítargaldur I er íslenskt gítarnámsefni fyrir byrjendur, sérstaklega ætlað börnum á aldrinum 7–12 ára. Efnið byggir á yfir 25 ára reynslu höfundar af gítar- og tónmenntakennslu og hefur verið þróað í gegnum áralanga kennslu með börnum og ungmennum.

Gítargaldur I skiptist í tvö hefti: Vinnuhefti og Lagahefti. Heftin vinna saman og leiða nemandann stig af stigi inn í hljóma, púls, áslátt og undirleik á kassagítar.

Í stað þess að fylgja einni fastri leið býður Gítargaldur upp á sveigjanlegt kennslukerfi sem hægt er að laga að aldri, getu og framförum hvers nemanda. Efnið er tekið fyrir á fleiri en einn hátt og nemandinn fær þannig endurtekningu og þjálfun án þess að námið verði einhæft.

Í Vinnuheftinu eru meðal annars:

• verkefni og æfingar í hljómum, púlsi og áslætti
• stigskiptar æfingar sem byggja markvisst ofan á fyrri færni
• einföld og aðgengileg taktkennsla með Búm–da og Búm–digi
• skýrar myndir og leiðbeiningar sem hjálpa nemandanum að æfa heima
• æfingatöflur sem styðja við reglulegar og markvissar heimaæfingar

Í Lagaheftinu er fjölbreytt safn kunnuglegra barnalaga sem nemandinn getur byrjað snemma að spila. Lögin eru sett upp með skýrum hljómum og einföldum ásláttarmynstrum og hægt er að laga þau að getu og raddsviði nemandans, meðal annars með gítarklemmu.

Áhersla er lögð á að nemandinn upplifi fljótt þá ánægju að geta spilað heil lög. Um leið er lagður sterkur grunnur að áframhaldandi gítar- og tónlistarnámi.

Gítargaldur I hentar bæði í einstaklingskennslu og hópakennslu. Efnið er fyrst og fremst ætlað til notkunar með gítarkennara, en skýrt uppsett heftin auðvelda jafnframt foreldrum að fylgjast með náminu og styðja við heimaæfingar.

Ítarlegar kennsluleiðbeiningar og viðbótarefni fyrir nemendur, foreldra og kennara er að finna á www.gitargaldur.is.